Хөгжлийн банкны идээ бээpийг шахалцсан эрхэм хоёр сэтгүүлчдээ захих амин захиас байна.

УИХ-ын дарга Г.Занданшатар Хөгжлийн банкны нээлттэй хэлэлцүүлгийн дараа сэтгүүлч Ч.Лодойсамбуу, Н.Өнөрцэцэг хоёрыг тусгайлан дуудаж уулзсан билээ. Сэтгүүлчдийг ингэж тооно гэдэг ховор тохиолдол шүү.

Уулзалтын үеэр УИХ-ын дарга Г.Занданшатар УИХ-аас Хөгжлийн банкны асуудлаар 22 гишүүнтэй дэд ажлын хэсэг байгуулан ажиллаж байгаагаа танилцуулан тус ажлын хэсгийн хийх ажилд хоёр сэтгүүлчийн санаачлан зохион байгуулсан “Өөрөөр нь төлүүлье” хэлэлцүүлэг маш их ач холбогдол үзүүлсэн талаар ярьсан байсан.

Үнэхээр хэн ч яаж ч сайн муу хэлж байсан нийгэмд өрнөж байгаа үйл явцыг мэдэрч, хурдтай шийдвэр гаргаж, олны анхаарлын төвд орж, бүхнийг мэдээлнэ, тэр тусмаа томоохон хэмжээний асуудлын учгаас атгаж, удирдана гэдэг амаргүй даваа.

Гэхдээ эрхэм хоёр сэтгүүлчдээ захих амин захиас байна, та хоёр үнэхээр ард түмэндээ үнэн зөв мэдээлэл хүргэж, Хөгжлийн банкны зээлдэгчдээр өрийг нь өөрсдөөр нь төлүүлэхийг чин сэтгэлээсээ хүсэж байгаа бол энэ нүсэр ажлын хэсэгт битгий ороорой доо.

Асуудлыг дотроос нь биш гаднаас нь харж байж л буруу зөвийг нь тунгаадаг юм шүү. Тиймээс та хоёр Хөгжлийн банкыг шалгах ажлын хэсэг дотор орж ажиллах биш харин яаж ажиллаж байгааг нь ард түмэндээ бодитоор сурвалжлан мэдээлэхийн тулд гаднаас нь ажиглаж цензургүйгээр мэдээлээрэй дээ.

Мөнгө амласан ч байсан, албан тушаал санал болгосон ч бай нийгэмд бугшсан идээ бээрийг шахаж байгаад чинь баярлаж байгаа шүү. Ард түмнийхээ итгэлийг дааж яваарай.

Хөгжлийн банкинд үүссэн асуудлаар Нээлттэй хэлэлцүүлэг зохион байгуулсан Сэтгүүлчдийн төлөөлөл болон Хөгжлийн банкны асуудлыг хариуцсан Ажлын хэсгийн гишүүдийн төлөөллийг УИХ-ын дарга Г.Занданшатар хүлээн авч уулзан, санал солилцож, ажлын хэсэгт тодорхой үүрэг чиглэл өглөө.

Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилтэд хяналт тавьж, шалгалт хийсэн талаарх Монгол Улсын Засгийн газар, Монгол банк болон аудитын тайлан, дүгнэлт зөвлөмжтэй танилцаж, дүнг УИХ-д танилцуулах үүрэг бүхий таван хүний бүрэлдэхүүнтэй ажлын хэсэг УИХ-ын даргын захирамжаар 2022 оны 01 дүгээр сарын 31-ний өдөр байгуулагдсан. Ажлын хэсгийн ахлагчаар УИХ-ын гишүүн Б. Баттөмөр, ажлын хэсгийн гишүүдэд Б. Бат-Эрдэнэ, Ц.Даваасүрэн, Б.Пүрэвдорж, С.Чинзориг нарын гишүүд багтан, ажиллаж буй.

УИХ-аас байгуулагдсан ажлын хэсэг энэ сарын 17-нд эхний дүгнэлтээ танилцуулах бол 21-нд эцсийн дүгнэлтээ гаргана. Ажлын хэсгийн дүгнэлт гарсны дараагаар уг асуудлаар Нээлттэй сонсгол зохион байгуулахаар төлөвлөж байгаагаа мэдэгдлээ.

Нийтийн сонсголын тухай хуулиар 14 хоногийн өмнө олон нийтэд нээлттэй зарлаж, 30 хоногийн дотор зохион байгуулах ёстой. Тиймээс Нээлттэй сонсголыг гуравдугаар сарын эхний долоо хоногт багтаан зохион байгуулахаар төлөвлөж байгаа юм байна.

Уулзалтын эхэнд “Энэ бол сүүлийн 10 гаруй жилийн хугацаанд хуримтлагдсан асуудлууд. 2015 онд УИХ-ын Ажлын хэсгийн дүгнэлт гарч байсан. 2018 онд ЗГХЭГ-ын Хяналт шалгалтын удирдамж баталсан. Хөгжлийн банкинд 2019 онд Аудитын газар, ЗГХЭГ-аас шалгалт хийгдэж, 2020 онд Сангийн яам, 2021 онд Монгол банк шалгаж, дүгнэлтүүд нь эцэслэгдэж, 10 жилийн турш яригдаж байсан боловч одоо олны дэмжлэг авч нэлээн чухал асуудал болж байна.

Олон талын хамтын ажиллагаа, та бүхний хичээл зүтгэлийн үр дүнд өнөөдрийн байдлаар 50 гаруй тэрбум төгрөгийн өр төлөгдсөн байна. Нэгдүгээр улиралдаа багтаад 200 гаруй тэрбум төгрөг төлөгдөхөөр график, төлөвлөгөө хийгдээд, амлалт үүрэг аваад ажиллаж байгаа юм байна.

Хууль хяналтын байгууллагуудаар АТГ-т 10, Эрүүгийн Цагдаагийн газарт 3, Дүүргийн цагдаагийн газарт 2, шүүхэд 25, Шүүхийн шийдвэр гүйцэтгэлийн газарт 8, хяналтын шатанд 6 хэрэг шалгагдаж байна.
Ажлын хэсгийн дүгнэлт гарсны дараа байнгын хороо хуралдаад Нээлттэй сонсгол зохион байгуулах чиглэлийг нэгдүгээр сарын 31-ний өдрийн захирамжаар ажлын хэсэгт чиглэл болгосон.

Ажлын хэсэг 22 хүний бүрэлдэхүүнтэй дэд ажлын хэсэг байгуулаад ажиллаж байгаа бөгөөд УИХ-ын Хяналт шалгалтын тухай хуулийн дагуу анхны ерөнхий хяналтын Нээлттэй сонсгол зохион байгуулагдах юм байна.

Уулзалтын төгсгөлд УИХ-ын дарга Г.Занданшатар “Хөгжлийн банкинд үүссэн асуудлаар хууль бус үйлдэлтэй хатуу тэмцэхийн зэрэгцээ асуудлыг хар цагаанаар нь ялгах шаардлагатай. Ном журмаар нь зээл аваад зориулалтын дагуу үйл ажиллагаа явуулж байгаа аж ахуйн нэгжүүдийг хэлмэгдүүлж болохгүй. Харин зээлийг зориулалт бусаар ашигласан, улстөрийн хамааралтай хүмүүст хатуу хариуцлага тооцох ёстой” гэсэн байр сууриа илэрхийлжээ.

Leave a Reply

Your email address will not be published. Required fields are marked *