ЭМЭГТЭЙ ТАМИРЧДЫГ ДЭМЖИХ ОЛОН УЛСЫН БИЗНЕС ХӨТӨЛБӨРТ О.ХУЛАН ХАМРАГДАХААР БОЛОВ.

“Ernst and Young” олон улсын аудитын байгууллагаас санаачлан хэрэгжүүлж буй эмэгтэй тамирчдыг дэмжих Women Athletes Business Network хөтөлбөрт 3х3 сагсан бөмбөгийн тамирчин, “Токио-2020” олимпын Монголын багийн тоглогч Онолбаатарын Хулан хамрагдахаар боллоо.

ОУОХ-ны гишүүн, МҮОХ-ны тэргүүн дэд ерөнхийлөгч, Монголын багийн ахлагч Б.Баттүшиг “Токио-2020” олимпын наадамд оролцсон эмэгтэй тамирчдад энэ мэдээлэл, боломжийг танилцуулж тамирчдын анкетийг илгээсэн бөгөөд хөтөлбөрт О.Хулан тэнцсэн байна.

Энэхүү хөтөлбөр нь 2022 оны 1-р_11-р сар хүртэл 10 сарын турш үргэлжлэх бөгөөд тамирчид спортын замналаа өндөрлүүлсний дараа бизнесийн салбарт амжилттай хөл тавихад туслах зорилготой.

Хөтөлбөрийн хүрээнд тухайн тамирчны бизнесийн мэдлэг, ур чадварыг сайжруулах, энэ салбарын нэр алдартай хүмүүсийн хүрээлэлд орох үүд хаалгыг нээх, цаашдын карьераа төлөвлөх, амьдрал дээр тулгарах аливаа асуудлыг шийдвэрлэхэд туслах зэрэг олон төрлийн сургалт, хичээлд хамрагдана.

Улмаар хөтөлбөрт хамрагдсан тамирчид гуравдугаар сард АНУ дахь *Nike* компанийн байранд зочилж, эмэгтэй тамирчдын бизнесийн сүлжээ уулзалтад оролцох юм.

О.Хулангийн хувьд Австралид суралцаж байсан, англи хэлний өндөр мэдлэгтэй нь энэхүү хөтөлбөрт тэнцэхэд нөлөөлжээ. МҮОХ-ны зүгээс эмэгтэй тамирчдаа тус хөтөлбөрт тогтмол хамруулахыг зорьж байна.

Leave a Reply

Your email address will not be published. Required fields are marked *